Заврши првиот ден на Северно-Атлантскиот Совет на НАТО на ниво на министри за надворешни работи на кој учествуваше и Министерот за надворешни работи на Република Северна Македонија, Бујар Османи, што се одржа во Седиштето на Алијансата во Брисeл. Воедно, ова е прв состанок со физичко присуство на Министер за надворешни работи на Министерските состаноци од нашето зачленувањето во НАТО.
На денешните две сесии од состанокот, министрите се осврнаа на прашања од стратешки приоритет на Алијансата, како што се регионалната стабилностç хибридни и сајбер предизвициç контрола на оружјето, разоружувањето и непролиферацијата. Беше разгледана стабилноста во соседството на НАТО и борбата против тероризмот, состојбите во Авганистан и Ирак.
На посебна сесија, министрите дадоа свои сугестии и видувања во однос на развојот на документот “НАТО 2030”, кој ќе биде предмет на усвојување на претстојниот состанокот на шефовите на држави и влади на Северно-атлантскиот Совет.
Во своите излагања, министерот Османи ја истакна посветеноста на Република Северна Македонија, како нов сојузник во рамките на Алијансата, во зајакнување на регионалната безбедност, како и активна партиципација во рамките на одржувањето на глобална безбедност. Османи го потенцираше и придонесот на земјава во однос на приоритетите на Алијансата во справувањето со безбедносните закани и предизвици. Во тој контекст, министерот Османи го истакна значењето што Алијансата го придава на борбата против тероризмот и преземените натамошни активности за справување со оваа закана. Изрази поддршка на стратешките предлози во врска со натамошниот концептуален развој на иднината на Алијансата содржани во НАТО 2030:
„Агендата на НАТО 2030 во вистинско време нуди амбициозни видувања за иднината на Алијансата во наредната деценија. Ние се согласуваме со поставените цели: НАТО да остане воено силен, да стане политички посилен и да има позасилен глобален пристап.“, истакна Османи.
Во рамките на Советот на министрите за надворешни работи на НАТО во Брисел, МНР Османи се сретна и со Државниот секретар на САД, Ентони Блинкен. Тема на разговори беше стратешкото партнерство меѓу Северна Македонија и САД која претставува основа за долгорочно пријателство меѓу двете земји.
На маргините на состанокот, министерот Османи оствари билатерална средба со министерот за надворешни работи на Словенија, АнжеЛогар. На средбата се отворија повеќе актуелни теми, за билатералниот развој на односите, европските перспектива на земјата особено со фокус на претстојното претседателство на Словенија со ЕУ, во втората половина на 2021г.
„Нашата цел е јасна, полноправно членство во ЕУ и сите наши напори се во таа насока, да работиме на европски начин за да ги достигнеме европските вредности. Очекуваме валоризација на постигнатото од нашите партнери”, посочи Османи на средбата со Логар.
Министерскиот состанок на НАТО продолжува и утре со бројни теми важни за иднината на Алијансата од интерес на зачувување на мирот и безбедноста на светскиот поредок.
